बेमौसमको बाजा

शरद्मा सयपत्री
फुल्न मान्दैन
बाँसुरीको धुन
जति मीठो भए पनि
बाँदर कहिल्यै
नाच्न जान्दैन
कोइलीको मीठो गीत
शिशिरमा सुन्न सकिन्न ।
हावा चलिरहेछ जोडले
टुकी बाल्ने प्रयास -
बाढी छ ठूलो
बगाउँछ यसले
माछा मार्ने कोसिस -
काग म गीत गाउँछु
भन्छ रे
बाघले घाँस खान
थाल्यो भन्दै
उर्लेका छन
एक हुल हल्काहरु
भेडा पनि ठूलो
विद्वान् बन्दैछ रे
हावा उल्टो बहेको
हल्ला छ सहरभरि
सूर्य पश्चिमबाट उदाएको
चर्चा छ गाउँभरि
हल्लैहल्लाको बजारमा
बेमौसमका बाजाहरु
बज्दैछन् ।
बेमौसमका बाजाहरु
चाहानाको सीमाभित्र
अटेका छैनन्
बाजाहरुबाट निस्केका
धुनहरु कर्णपृय
लाग्दैनन् मानिसलाई
कोलाहलमय छ
बाजाको धुन
तैपनि
घन्किरहेका छन्
बेमौसमका बाजाहरु ।