त्यहाँ सिंगो नेपाल हुन्छ

भित्तामा छन् गौतम बुद्ध 

झुण्डेको छ भित्तामै खुकुरी 

देश भित्तो हुन सक्दैन

तर भित्तामा देश टाँगेको छु

मनमा छ मेची 

टाँस्सिएको छ दिलमा महाकाली 

सम्झना र देश अलग कुरा हुन् 

तर सम्झनामा देश अड्याएको छु 

छ फेसबुकमा मेरो  भ्याउरे खेाला  

माइस्पेसमा छन् गाउँले मेरा 

देश तस्विर हुन सक्दैन 

तर तस्विरमा झुन्डेको छ देश 

टिर्सटमा मुद्रित छ हिमाल

टोपीमा खोपिएको छ नेपाल 

अक्षर र चिन्ह देश होइनन् 

तर प्रतिकमा फैलेको छ देश  

ब्लगभित्र 'डिजिटल्लि' छ नेपाल 

वेब पेजभित्र पत्रैपत्र छ हिमाल 

होइनन् , हुँदै होइनन् देश यी 

तर छापिएको छ देश इन्टरनेटमा 

पछ्याइएको छ मातृभुमी टि्वटरमा

खोजिन्छ 'ग्रेटर नेपाल' गुगल र युट्युबमा

क्लिक भइरहेछ मातृभुमी हरक्षण

डेस्कटप, ल्यापटप र ग्याजेटहरुमा

  

एनएको विमानबाट ओर्लँदा

देखिने भुमिमात्र देश होइन अब 

देश अचेल संसारको कुनाकुनामा हुन्छ 

चाहिन्छ दृष्टि, त्यहाँ सिंगो नेपाल हुन्छ